LOLITAKANA YUSUPU
Ananahe Yako
Pewaliana 35:22b Ananahe Yako tobalilo hampulo hai rodua. 23 Ananahe hai sambokona Lea; au towutu Rube, pane Simeo, pane Lewi, pane Yuda, pane Isaka, pane hangko Sebulo. 24 Ananahe hai sambokona Raheli; au towutu Yusupu, pane au toadi Benami. 25 Ananahe hai sambokona Biliha, hawina Raheli, iami Dani au towutu hai Natali au toadi. 26 Ananahe hai sambokona Silipa, hawina Lea, iami Gadi au towutu hai Asere au toadi. Idemohe anana Yako tobalilo au rapoanaka i Mesopotamia.
Anti pangipina Yusupu rakahihi halalunahe
37:1 Yako maida i tampo Kanaa, paida-idaana umana, 2 hai idemi tuntukana pemuleana Yako. Hampulomi hai pitu parena tinuwuna Yusupu, ia meula-ulami mamporewu towau hai dimbana umana hihimbela hai wutunahe anana Biliha hai Zilipa, towawine rodua au natendahe umana. Yusupu mampogilu babehianda wutunahe au kadake i umana. 3 Yako mampokakaya ntepuu Yusupu panehe halaluna, lawi ia rapoanaka i kasaeanami umanda. Pane hambela tempo rapandauami hantau badu au makara. 4 I karaltana halaluna batena pea ia au napomahile umanda pane ihira, idomi hai pane mepongkamohe mokahihi Yusupu, hai barapohe mau mololita maroa iria. 5 I hambela tempo mangipimi Yusupu, hai pangipina iti napetumbui i halalunahe, ido hai tetambaimi pekahihinda halaluna iria. 6 Node nauli irihira, 7 "Mangipina ikita ope-ope tanganta i bonde kakau mokoto-koto pare. Pane parengku meangka togo i tanga hai paremi motoleliki motumpai parengku." 8 Mehanahe halaluna, "Nabuhu inaomu oyo ina mewali datu au makuasa irikami?" Anti pampetumbuina pangipina pane terarangimi karumpunda halaluna iria. 9 Hambela mani Yusupu mangipi hai pangipina iti napetumbui mbulimi i halalunahe, nauli, "Iko mangipi mbulina. Kuita alo, wula hai betue hampulo hai haogu motumpa iriko." 10 Pangipina ide napetumbui wori i umana, hai nakambaroa umana, nauli, "Pangipi apa au noiti? Peundeamu pae iko, inamu hai halalumuhe ina motumpa irio?" 11 Mahina ntepuumohe halaluna iria agayana umanda bara ope-ope mampekiri pangipi iti.
Yusupu rapobalu hai raanti lao i Masiri
37:12 I hambela tempo wutunahe Yusupu laohe i Sike mamporewu towau hai dimbana umanda. 13 Nauli Yako i Yusupu, "wutumuhe mamporewu towau hai dimba hungku i Sike. Meangkamoko laohe mai nupeita." Menana Yusupu, "Io, uma." 14 Nauli umana, "Laoko mampeita wutumuhe hai towau dimba bona mai nupetumbui iriko kaaranda." Pane rapopeangkami Yusupu mopalehi lembo Hebero. Bara mahae polumaona teduumi Yusupu i Sike. 15 Tangana molumao i pada node hou node mai mohaokl paidanda wutuna, ia mohidupa hai hadua tobalilo au mekune iria, "Apa au nuhaoki?" 16 Mehana Yusupu, "Wutungku mai he mamporewu towau hai dimba inde. Babila taisato kaiumbanda?" 17 Nauli tauna lti, "Barapohe inde. Kuhadi rauli melimbamohe lao i Dota." Pane meangkami Yusupu mokulele wutuna hai nahumbamohe i Dota. 18 Kakarao manl raitami Yusupu, hai hangko damani teduu irihira, mohawamohe ina rapapate. 19 Molololitamohe hadua hai hadua rauli, "Pelta oloumi mai to pangipi-ngipi. 20 Tapapateke hai watana tanawo i lalu tibubu au bangi pane tapololita matemi nahaka singa. Tapeita mpuu ba noumba pewaliana pangipi-ngipina." 21 Pohawanda iti nahadi Rube, ido hai pane nahaoki rara ina mopatuwo Yusupu. Nauli Rube, "Inee woya tapapate. 22 Tanawo peami i lalu tibubu au i pada wungi ide agayana inee tapapahai ba tabebelai watana." Tunggaiana Rube ide bona mopatuwo Yusupu hai moanti mesule i umanda. 23 Kahawena Yusupu irihira, liu-liu rahaka hai rabungkahi baduna au makara, 24 pane rabisoso lao ranawo i lalu tibubu au bangi. 25 Mepongkamohe maande, unga pea raita hamporangaahe tauna pemuleana Sumaila hangko i Gilea laohe i Masiri. Ontanda rapopatekei rampa-rampa hai lana au mawongi. 26 Nauli Yuda i halalunahe, "Apami bunduna adinta tapapate hai lia tawuniangi? 27 Mobundumi tapobalu i pemuleanahe Sumaila. Inee woya tapopeahi-ahi lawi ia worl mia-mia adinta." Halalunahe mampeulai lolitana ide. 28 I tempo iti melempomohe topobalu-balu to Midea, pane Yusupu raoremi wutuna hangko i lalu tibubu, pane rapobalumi i pemuleanahe Sumaila hai holona rompulo pekana pera. Ia raantimi lao i tampo Masiri. 29 Babehianda ide bara woya naisa Rube, lawi kalaona i tibubu, napetiro barapi ara Yusupu i lalu tibubu, ido hai mohepa-hepami hampina lawi masusa laluna. 30 Pane mesule Rube i adinahe hai nauli, "Yusupu barapi ara i lalu tibubu. Apami au kubabehi ide-ide?" 31 Pane rasambalemi hambaa towau, rahongko wahena rapoemei baduna Yusupu. 32 Badu au makara au handami wahe ratudua tauna ntani lao moanti i umanda hai ratewai, "Badu ide kilambi. Taparesa hampai. Ba baduna ananta, ba bara?" 33 Yako naisa ntepuu badu iti, pane nauli, "Tou, iti baduna anangku! Manoto wei nahakami singa hai nahepa-hepami." 34 Yako mohepa-hepa hampina anti kamasusana laluna pane mopakemi waru ombo. Bahangkia alona ia moteriahi anana. 35 Hawemohe ope-ope anana tobalilo hai towawine maihe mopalindo umanda. Agayana umanda bara mau tepalindo, nauli, "Duungku mate moteriahi liu-liuna anangku." Nodo mpuumi Yusupu nateriahi umana.
Yusupu hai towawinena Potipa
39:1 Yusupu raantimi pemuleana Sumaila lao i tampo Masiri, pane rapobalu i Potipa, hadua tauna au motadulakoi topokampai souna datu. 2 Kamaidana i ampuna iti, ia nanini Pue Ala, ido hai ope-ope bagona maroa pewalina. 3 Naitami ampuna kaPue Alana au monini Yusupu, pane hinangkana au napobago mewali maroa. 4 Ido hai matana laluna Potipa iria, pane naangka mewali topokadipurana au mokadipura souna hai ope-ope anuna. 5 Hangko inditi anti kaYusupuna, Pue Ala mowati katuwona Potipa to Masiri iti hai hinangkana anu-anuna, maroa au i souna ba i pobondena. 6 Ope-ope anu-anuna Potipa naweimi Yusupu mokadipura. Ido hai pane Potipa barapi mourusi hinangka bago i lalu sou, batena pearai maande. Yusupu hadua anantomoane au maroho hai malenggea. 7 Pane napokaelu towawinena Potipa, hai nawawaha bona maturu sambelahe. 8 Agayana Yusupu bara mau, nauli, "Ineeko nodo ampuku towawine. Ikomi au napoinalai mokadlpura ope-ope anuna ampuku. Ia barapi mampekiri ihi sou ide. 9 Kuasangku himbela hai kuasana. Bara mpuu ara au bara napoinalai, bara tauli oyo sambokona. Peisana pae mobabehi dake hai mobabehi dosa i Pue Ala?" 10 Kehapiri nodo, towawinena Potipa alo-alona mokelo-kelo Yusupu, agayana anantomoane iti bara mampeulai peundeana. 11 I hambela tempo Yusupu mobago i lalu sou haduduana; bara ara tauna ntanina inditi. 12 Towawinena Potipa mohintaki komona hai nadii, pane nauli, "Maimodeko maturuke." Yusupu mokarumbetu hai tekabaha, pane melangka lao i raoa, agayana komona napalehimi i tayena towawine iti. 13 Mampeita Yusupu melangka hai mopalehi komona, 14 ia mokakio taunanahe hai nauli, "Nipeita to Ibarani au naanti mai tobalilongku i sou ide maike napakadake. Ia mesua i lincuku ina natiena, agayana mongangana rurumihi. 15 Anti pongangangku, ia melangka lao i raoa. Ide komona napalehi." 16 Mewali komona iti naala nawoli, hai ia mampegia pesulena tobalilona. 17 I pesulena tobalilona, napetumbuia apa au mewali iti, nauli, "Ohou to Ibarani, au nuanti mai, mesua i lincu paturuanta ina napakadakena. 18 Agayana mongangana, hai pane melangka lao i raoa. Ideto komona napalehi." 19 Kanahadina lolitana towawinena, rumihi karumpuna Potipa. 20 Natudu tauna bona ia rahaka hai rapopesua i lalu tarunggu, potarungguanda tauna au masala i datu. 21 Agayana Pue Ala au mamporangai hai mampokaahi Yusupu, pane tadulako tarunggu mampomaroa ia. 22 Mewali ia napoinalai tadulako tarunggu, pane rawei bago mokadipura hinangka bagona to ratarunggu. 23 Ia barapi paralu mokamata to rahuku rapoinalaiami Yusupu lawi Pue Ala mamporangai ia, pane mewali maroa pobagona.
Yusupu mopakanoto lempona pangipinda toratarunggu
40:1 Bara mahae hangko inditi, rodua hawina datu to Masiri, iami topokadipura paenuna hai toporotina, mobabehi sala i datu. 2 Mewali rumpu datu i tauna rodua iti, 3 panehe rapopesua i tarunggu i souna tadulako topokampai souna datu i paidana Yusupu ratarunggu. 4 Mahae worihe ratarunggu, hai tadulako topokampai souna datu motudu Yusupu mokadipurahe. 5 I hambela wengi topokadipura paenuna hai toporotina datu mangipihe. Lempona pangipinda bara himbela. 6 Madondo hawemi Yusupu, naitahe masusa lalunda. 7 Pane napekune, "Moapari nodo masusa laluml alo Ide?" 8 Mehanahe, "Inona kaindi mangipingkai hai bara ara au mangisa lempona." Nauli Yusupu, "Batena Pue Ala makuasa mopakanoto lempona pangipi. Nipetuntu mai iti pangipimi." 9 Nauli topokadipura paenu iti, "I lalu pangipingku kuita ara hampoa anggoro i lindoku. 10 Patoana mopenga talu. Penga-pengana mepongka motawe hai mowunga alana mowua hawe mangka. 11 I tempo iti tangangku mokingki paenuana datu, mewali kuala wua anggoro iti hai kupie i paenuana pane kuhuhua datu." 12 Nauli Yusupu, "Idemi lempona: Talu pengana iti lempona talu mani alona. 13 I lalu talu alona ide, datu ina mampopesuwumoko, naampungiko hai napopesuleko i bagomu hangkoya. Oyo ina mokadipura mbuliko paenuna datu. 14 Agayana ane maroami katuwomu ineena naliu inaomu. Kuperapi nupahawe i datu noumba kana i katuwongku, bona napopesuwu wongkoya hangko i tarunggu ide. 15 Lawi katouana iko hangkoya rapelangkahana mai tauna hangko i tampoki to Ibarani, hai hungkaku inde i tampo Masiri, bara manina hambela mobabehi dake panena ratarunggu node". 16 Napehadingi toporoti lempona pangipina topokadipura paenuna datu iti maroa, ia wori mololita i Yusupu, nauli, "Iko wori mangipina; kuhoa talu bingkana roti. 17 Bingka au i wongko moihi mampopengaa roti kuantia datu, agayana hawehe tadasi mai motilo-tilo roti iti." 18 Mehana Yusupu, "Idemi lempona pangipimu: Talu bingkana lempona talu mani alona. 19 I lalu talu alona datu ina motudu tauna mosambaleko hai watamu ratoe i kau bona natilo-tilo tadasi ontomu." 20 Talu alona hangko inditi, datu mamposusai tinuwuna mobabehi susa mahile hai nakakiohe ope-ope topobagona. Napohawaa bona topokadipura paenuna hai toporotina rapopesuwu hangko i tarunggu raantihe i lindonda ope-ope topobagona. 21 Topokadipura paenuna datu rapopesule mbuli i bagona hangkoya. 22 Agayana toporotina ratoe hawe mate hintoto hai au nauli Yusupu. 23 Anti kamaroanami katuwona topokadipura paenuna datu iti, ido hai barapi mokatuinao Yusupu. Naliu ntepuumi inaona.
Yusupu mampololita lempona pangipina datu i Masiri
41:1 Liumi rompare, mangipimi datu i Masiri. I lalu pangipina naita ia meangka i wiwi owai Nili. 2 Unga pea naita mesupa hangko i owai pitu baana japi au marudu hai mahile tanganda mangkuku i wiwi owai iti. 3 Hangko inditi mesupa wori pitu baana japi au ntanina. Binata iti modongkuku hai koli pearai mobungkuhi buu. Japi au maduhu iti meangkahe i holanda japi au marudu i wiwi owai iti. 4 Roo indo, japi au maduhu maandehe japi au marudu. Inditi pehadimi datu. 5 Bara mahae tekaleli datu hai mangipi mbulimi. I lalu pangipina naita pitu wulina pare au moihi tuwo i hambua kauna. 6 Pane tuwo wori pitu wulina pare au wara lawi paka nawui himburu. 7 Pare au wara iti moame pare au moihi inona. Roo indo datu pehadi hai naisa kamangipina. 8 Mearo madondo datu, bara maroa pehadina, ido hai napopekakiohe tauna topangisa hai hinangka tomapande i Masiri, pane napetumbuiahe pangipina iti. Agayana bara ara au mangisa lempona. 9 Nauli topokadipura paenu i datu, "Alo ide mangakumona salangku i ampuku datu lawi 10 hangkoya datu rumpu i toporoti hai iriko, panengkai rapopesua i lalu tarunggu i souna tadulako topokampai souna datu. 11 I lalu hambengia ikami rodua mangipi, hai pangipingki bara himbela lempona. 12 Ara hadua anantomoane to Ibarani au ratarunggu sambelangkai. Ia motadulakoi topokampai souna datu. Kipetumbuia pangipingki iria hai nauliangaangkai lempona. 13 Tongawa mpuu au napololita iti mewali haha, lawi datu mampopesulemona i bagongku hangkoya, agayana toporoti iti ratoe hawe mate." 14 Ido hai datu mampopeala Yusupu, pane holigami rapopesuwu hangko i tarunggu. Roo mangkou hai mempahuru, laomi molindo datu. 15 Nauli datu iria, "Iko mangipina, hai bara ara hadua tauna au mangisa lempona. Ara au mopahawe iriko, oyo mobuku molempo pangipi." 16 Mehana Yusupu, "Bara wokoya iko, ampu, agayana Pue Alari au mopatongawa lempona au tou." 17 Pane nauli datu, "Iko mangipi tangangku meangka i wiwi owai Nili. 18 Unga pea mesupa hangko i owai iti pitu baana japi au marudu hai mahile mangkukuhe i wiwi owai. 19 Pane mesupa wori mai pitu baana japi ntanina au maduhu ntepuu; watanda koli pearai mobungkuhi buu. Bara mani ara kuita japi au nodo kamaduhunda i tampo Masiri. 20 Japi au maduhu iti moandehe pitu baana japi au marudu inona, 21 agayana japi au maduhu iti, mia-mia pea kamaduhunda. Hangko indo pehadimona. 22 Bara mahae tekalelina hai mangipi mbulina; inditi kuita hangkau pare mowua pitu wulina au moihi hai mangka. 23 Pane tuwo wori pitu wulina pare au wara lawi paka nawui-wui himburu. 24 Pare au wara iti moamehe pare au moihi inona. Pangipingku au rompaka ide roomi kupetumbui i topangisa, agayana bara hadua mangisa lempona." 25 Pane nauli Yusupu i datu, "Rompaka pangipi iti, himbela pea lempona, napatongawami Pue Ala i ampu datu apa au ina mewali. 26 Pitu baana japi au marudu hai pitu wulina pare au moihi, lempona pitu parena maroa katuwonda; rompaka iti himbela pea lempona. 27 Pitu baana japi maduhu hai pitu wulina pare au wara lempona pitu parena kamahaena ina marimi. 28 Idemi au kupahawe irio ampu, lawi Pue Ala mopatongawami i ampuku apa au ina mewali. 29 Ina mewali i lalu pitu parena handaka polambianda tauna, hai maroa katuwonta i humalele tampo Masiri. 30-31 Roo iti, ina hawe karimi pitu wori parena, hai kamatananta hangkoya naliu inaonta, lawi i tempo kapari ina morumpa tampo iti duuna maduhu. 32 Ampuku mangipi rombela lawi Pue Ala ina mampopewali suka peundeana, hai bara mpuu daholiga pewalina. 33 Mewali ane maroa ampu, nupileimi hadua tauna au mapande hai manoto laluna nuwei kuasa mokadipura tampo ide. 34-35 Ampuku hangangaa moangka topobago au ntanina hai nuweihe kuasa moruru hangkira lima hangko i pasumbanda mowia i lalu pltu parena i tempo mabuhu, bona ragulu boea-boeana hai rakampai. 36 Pare iti rapatimamami, bona ara paandenda tauna i lalu pitu parena kamarimi i tampo Masiri. Mewali ane nodo, taunanta bara ina mateoho."
Yusupu ralanti mewali biti datu i Masiri
41:37 Datu hai ope-ope topobagona mampokana pelambiana Yusupu iti. 38 Nauli datu irihira, "Manoto barapi ara tauna ntanina talambi au himbela hai Yusupu, lawi ia nanini inaona Pue Ala." 39 Nauli datu i Yusupu, "Pue Ala au mampopaisa ope-ope ide irio. Mewali tongawa oyo pea au mapande ntepuu panehe tauna au ntanina. 40 Ina kulantiko mewali biti datu, hai ope-ope parentaku hangangaa mampeulai pohawamu, batena rai iko au i wongkomu." 41-42 Roo iti datu mowosui sisikalena kadatua hai nakapusa i karawena Yusupu, pane nauli, "Ide-ide kulantiko mewali biti datu i tampo Masiri." Pane rabadula hambua badu mandoe au maalusu banana hai raenoi rante bulawa. 43 Hangko indo raweimi kareta kadatua au kadua napengkahei hai topokampai datu molumao ioru kareta iti mepopaisa, "Pogia! pogia!" Nodemi karalantina Yusupu i tampo Masiri. 44 Nauli datu iria, "Iko ide datu, hai iko mampopaisaa i tauna ane bara metompa irio bara mpuu peisa mobabehi apa-apa i tampo Masiri." 45-46 Pane datu mowei hanga to Masiri i Yusupu, iami Sapana panea. Rawei wori sambokona au rahanga Asana, anana Potipera au motadulakoi sou penombaa i kota Heliopoli. Tinuwuna Yusupu talu pulona parena i tempona ia mepongka mobago i Masiri. Melingkami Yusupu hangko i souna datu lao mantoleli i ope-ope boea i tampo Masiri. 47 I lalu pitu parena maroa katuwonda tauna, hinangka powianda mewali ntepuu. 48 Pare iti nahawaka Yusupu rarampu pane rawoli i boea-boeana hangko i polambianda ampu boea iti. 49 Anti kangkayanami pare au ragulu iti, mengkaroomi Yusupu mohoka, lawi kangkayana pare iti himbela wungi i wiwi ntahi. 50 Hangko damani hawe tempo rimi, Asana, sambokona Yusupu, moana rodua tobalilo. 51 Naul1 Yusupu, "Au nababehimi Pue Ala iriko, ide pane naliumi inaongku hinangkana kaparingku hai ope-ope tinana umangku." Idomi hai nahanga anana au towutu "Manase". 52 Hai nauli mbuli, "Naweina Pue Ala rodua anangku i tampo kamapariangku"; ido hai nahanga anana au toadi "Eparai". 53 Pitu parena kamaroana katuwonda tauna i tampo Masiri hopomi, 54 hawemi tempo rimi pitu parena i humalele dunia hintoto au nauli Yusupu, agayana i tampo Masiri pea ara paande. 55 I temponda to Masiri mepongka marimi laomohe merapi paandenda i datu. Pane natuduhe, nauli, "Laomokau i Yusupu, hai nipeulai hinangkana apa au nahawaka irikamu." 56 I karurumihianami karimi i humalele boea, natuduhe Yusupu tauna mobungkahi ope-ope tambaru hai mampobalu pare i to Masiri. 57 Anti kamarimi au rumihi iti, tauna hawe i tampo Masiri hangko i humalele dunia meholo pare i Yusupu.
Wutunahe Yusupu lao i Masiri meholo pare
42:1 Kanahadina Yako ara pare i Masiri, napololitaamohe anana, "Moapari hai roo-roo peakau? 2 Kuhadimi kaarana pare i Masiri. Laomokau mai indolou hai niholo mai pare datike mateoho." 3 Pane lao mpuumohe hampulo wutuna Yusupu iti hangko i tampo Kanaa meholo pare i Masiri. 4 Agayana Yako bara mopaliu Benami, wata adina Yusupu, raanti raporanga, lawi napokalanga dati molambi rugi anana iti. 5 Lawi kamarimi i tampo Kanaa, ananahe Yako hai bosa tauna ntanina laohe meholo pare i Masiri. 6 Au mampobalu pare i tauna hangko i humalele dunia iami Yusupu, lawi ia biti datu i Masiri. Idomi hai pane i kahawenda wutuna Yusupu motumpahe i lindona. 7 I kanaitana Yusupu wutuna, naisatohe, agayana ia mengkawuli nodo barahe naisa. Mahara pampekunena irihira, nauli, "Ikamu to apakau?" Mehanahe, "Ampu, ikami to Kanaa, maingkai meholo paandeki." 8 Nauri naisa kawutunatohe, agayana ihira bara moisa Yusupu. 9 Pane nakatuinaomi pangipina kana irihira hai nauliaahe, "Ikamu ide tomependenga maikau mampeita iumba kaledeana tampoki." 10 Mehanahe, "Bara wokamia, ampu. Maingkai batena meholo pare. 11 Ikami ide, hampohalaluangkai. Ikami tauna maroa, barangkai tomependenga." 12 Nauli Yusupu irihira, "Dongkomi! Ikamu mai moparesa iumba kaledeana tampoki ide." 13 Mehanahe, "Ikami mohalalu hampulo hai rodua, ampu, hadua pea umangki i tampo Kanaa. Hadua halalungki matemi hai hadua adingki au totoadi ide-ide mamporangai umangki." 14 Mehana Yusupu, "Tou-tou mpuu nodo kuuli, ikamu ide tomai mependenga. 15 Ina kupampeitaikau. Mosumpana i lalu hangana datu, barakau peisa padu hangko i tampo ide ane adimi au totoadl bara mani hawe inde. 16 Hadua hangko irikamu mesule lao mai moala adimi. Au ntanina kutaha inde bona tongawa mpuu katouna lolitami. Ane bara, i lalu hangana datu ikamu ide tomependenga." 17 Pane napopesuahe i lalu tarunggu talu alona kamahaena. 18 I kataluna alona napopeala mbulihe Yusupu halaluna pane nauliaahe "Iko tauna au langa hai mengkoru i Pue Ala. Ikamu ina kukabaha ane nipeulai rara au node. 19 Bona tongawa mpuu kaikamuna tauna manoto, hadua hangko irikamu kutaha i lalu tarunggu, hai au ntanina peisami mesule moanti pare au niholo bona rapotuwo tinami au tangana mantodiha rimi. 20 Ane mai mbulikau, hangangaa nianti mai adimi au totoadi iriko. Inditi tongawa katouna lolitami hai barapokau kuhuku mate." Rapokanami pobotusina biti datu iti. 21 Pane mololitamohe hadua hai hadua, "Peita, ikita ide-ide rahuku mampohurungake kamasalanta i adinta hangkoya; kehapi woya merapi ahi agayana bara tapehadingi, nauri taitato kamaparina. Idomi pongkana pane ide-ide molambike kapari au node." 22 Nauli Rube, "Bara pae hangkoya kuuliangaamokau, bona anangkoi iti inee woya tapopoapa, agayana bara nipehadingi. Mewali ide-ide kapatena tapohurunga." 23 Yusupu moisa lempona basanda, agayana ihira bara moisa kanodona, lawi ane mololitahe hai ia, mopakerahe hadua guru basa. 24 Yusupu mopalehihe halaluna hai lao moteria. I tempona nabuku mbulimi mololita, ia mesule i halalunahe, pane moala Simeo napopehilu i lindonda halaluna.
Wutunahe Yusupu mesule i Kanaa
42:25 Yusupu mohawaka bona ope-ope karunda wutuna au raanti raihi pare, hai doinda hadua-hadua rapusa hule pea i lalu karunda pane rawei worihe bakunda i rara. Hawana iti rapeulai. 26 Hangko indo wutuna mohawiramohe antianda i kalide, pane meangkamohe mesule. 27 I pohambengianda, hadua hangko irihira mobungkahi karuna ina mopaande kalidena. Nahumbari doina ara i baba karu iti. 28 Nauliaahe halaluna, "Doingku rapopesule! Peita, ara inde i lalu karungku!" Rapotingkara hai langahe pane mombekune-kunehe, "Apari wei au nababehi Pue Ala irikita?" 29 Kahawenda i Kanaa rapololita i umanda, hinangkana au mewali irihira, 30 rauli, "Biti datu i Masiri mahara pololitana irikami hai naraingkai tomependenga i tampona. 31 Mehanangkai, 'Ikami tauna manoto, barangkai tomai mependenga. 32 Ikami mohalalu hampulo hai rodua, hadua pea umangki, hai hadua adingki matemi, pane au totoadi ide-ide mamporangai umangki i Kanaa.' 33 Nauli biti datu, 'Kupampeitaikau bona tongawa mpuu katouna kaikamuna tauna manoto; hadua hangko irikamu ina kutaha inde, au ntanina peisami mesule moanti pare i tinami au tanganda mantodiha rimi. 34 Ane mai mbulikau, nianti mai adimi au totoadi; inditi kuisami barakau tomependenga agayana ikamu tomanoto. Mewali halalumi au kutaha inde ina kupopesule irikamu, hai peisamokau maida hai mobalu-balu inde.'" 35 Rabumbuhami pare au i karunda, hadua-haduahe molambi karapenda au kehi doi; ido hai rumihi kalanganda, nodo wori umanda. 36 Pane nauli umanda, "Ikamu pongkana panehe matanta ide anangku. Yusupu barapi ara; Simeo bara wopi ara; hai ide-ide Benami niuli mbulimi ina nianti. Rumihi mpuumi dide parina lalungku." 37 Nauli Rube i umana, "Nuweina iti Benami, uma. Iko mopangaku moanti mpesule; ane bara mesule, anangku tobalilo rodua peisa nupapate." 38 Agayana nauli Yako, "Bara! Benami bara peisa nianti; wutuna matemi hai ia pearai au ara ide-ide, hai pari lalu au nipaarana ina moantimi kapateangku."
Wutunahe Yusupu lao i Masiri hihimbela hai Benami
43:1-2 Kamarimi i tampo Kanaa rumihi ntepuu, hai pare au lao mai raholo i tampo Masiri opemi raande Yako hampoanaka. Pane nauli Yako i ananahe, "Lao mbullkau mai i Masiri meholo pare bona ara paandeta." 3 Nauli Yuda i umana, "Rumihi kanapopaingangki biti datu i Masiri, barangkai peisa lao i lindona ane bara kianti Benami. 4 Ane nupallu iti adingki kianti, maungkai lao meholo paandeta, 5 agayana ane bara nupaliu kianti, barangkai mau lao, lawi roo amimi nauli biti datu barangkai peisa lao iria ane adingki bara meula." 6 Nauli Yako, "Moapari hai nipakasusa gagana pane niuliari tauna lti kaarana mani adimi?" 7 Mehanahe, "Tauna iti mopetampa ntepuu kana irikita hantina, nauli, 'Tuwo mani pae umami? Mole ba ara mani adimi tobalilo au ntanina?' Idomi hai pane klhanai pearai hinangka pekunena. Bara naduu pekiringki ina natudungkai moanti iti adingki iria." 8 Pane nauli Yuda i umana, "Nupaliumi anangkoi iti meula, bona polo melingkamongkai dati ara irikita au mate laloara. 9 Ikomi au mangisa tuwona, peisa nuhaoki iriko ane bara mai kuanti mesule i uma, kupoharara duungku mate. 10 Ane barangkai mahae mepegia node, kerompalimongkai mesule." 11 Pane nauli umanda, "Ane lawi nodomi, nianti wori apa polambiata i tampo ide au maroa nipusa i karumi nipopedupa i biti datu; nodo balase, tinaha, rampa-rampa, beau hai wua haleka. 12 Nlanti wori doi rombela kangkayana, lawi doi au nilambi i lalu karumi lao pea nipopasule, babila anti kawulinda. 13 Niantimide adimi hai holiga peakau mai mesule. 14 Taperapi i Pue Ala au makuasa bona biti datu iti mampokaahikau hai mampopesule Benami hai Simeo. Kana iriko, ane lawi matantamohe ide anangku, tapanoumba pae?" 15 Hangko inditi halalunahe Yusupu moanti pedupanda hai doi rombela kangkayana, panehe meangka lao i Masiri hihimbela hai Benami. Kahawenda indolou lao mpuumohe mampombelambia Yusupu. 16 Kanaitana Yusupu Benami hai halalunahe, mampohawaami tadulako topokadipura souna, nauli, "Nuantihe tauna iti i soungku lawi ihira ina maande sambela hai iko pualo lde. Nusambale hambaa binata nudaka hai nupatimama maroa." 17 Topokadipura sou iti mopasilolonga apa au rahawaa hai moantihe halaluna Yusupu i lalu souna. 18 Karaantinda i souna Yusupu, langamohe hai rapoponbeuli, "I karaantita inde babila mampohurungake doi au tahumba i baba karunta kamainta hangkoya. Ikita ide ina rahaka, raala kalidenta hai rapohawike." 19 Idomi, hungku i baba souna Yusupu, ihira mololita i tadulako topokadipura sou, rauli, 20 "Kiperapi ampu kipahawe, lawi hangkoya hambelamongkai mai meholo pare. 21-22 pesulengkl, i pohambengiangki, kibungkahi karungki hadua-hadua. Kipotingkara lawi doi popeholongki pare ara i baba karu hai bara kiisa kahemana au mowoli doi iti. Hai doi iti batena kianti mai hihimbela hai doi au ina kipopeholo mbuli pare." 23 Nauli topokadipura sou, "Ineemokau langa. Inee karao inaomi. Pue Ala au napenombai umami, Ia au mopusa hule doi iti i karumi, hai holona paremi roomi kutarima." Hangko inditi raantimi Simeo irihira, 24 panehe raanti i lalu sou. Raweihe owai, rapopobahoi bitinda hai kalidenda rapaande wori. 25 Pane rapatimama popedupanda i Yusupu ina rawei i temponda maande sambela pualo, lawi roomohe rapopaisaa. 26 Kahawena Yusupu i sou, rahuhua mpuumi anu-anu popedupanda panehe meampu iria. 27 Napekunemohe Yusupu nauli, "Pololitami iriko kana i umami au matinuwumi. Noumba ia ide-ide? Ba maroa-roato?" 28 Mehanahe, "Io, ampu, umangki maroa-roato," panehe motumpa i lindona Yusupu. 29 Kanaitana Yusupu Benami, nauli, "Mewali idemi pae adimi au totoadi au roomi nipololita lriko? Taperapi, anangku, bona nawatiko Pue Ala." 30 Laluna Yusupu rumihi kamabilana hai kamaahina i adina au hangina-nginana ina barapi nabuku motaha hai laluna, ido hai nagagumi mesua i lincuna moteria. 31 Roo nodo ia mewawalindo pane mesuwu mbuli. Naurl motaha laluna, ia motudu anangkoina nopatimama paandenda. 32 Yusupu tepatani meja paandeana hai halalunahe i meja hambuana. To Masiri maande worihe i haogu meja, lawi bara hintoto maande hihimbela hai to Ibarani. 33 Halalunahe Yusupu rakadipura i hambua meja. Mombelindo hai mejana Yusupu, rapopohudahe moula pombeusuna tinuwunda mepongka au totowutu hawe au totoadi. Karaitana pea pembeusu-usuna pohudanda, mombekilamohe hadua hai hadua hai rapotingkara. 34 Ihira rarorahe hangko i mejana Yusupu hai rorana Benami lima belana kangkayana hangko kiranda wutuna. Panehe maande sambela hai Yusupu i lalu katana-tana.
Paenua pera au matanta
44:1 Hangko inditi Yusupu mampohawaami tadulako topokadipura souna, nauli, "Nuihii pare iti karunda, suka-sukana pebukuanda moanti, hai doinda hadua-hadua nupusa hule i karunda nuwoli i wongko pare. 2 Nupusa wori paenuangku au hangko i pera i lalu karuna adinda au totoadi hihimbela hai doi popeholona pare." Topokadipura souna mampopolumao hawa iti. 3 Kahalona madondo-dondo ntepuu, mogaa-gaamohe Yusupu hal halaluna pane meangkamohe hai kalidenda. 4 Bara manihe karao hangko i kota, nauli Yusupu i tadulako topokadipura souna, "Kulelehe holiga tauna orei. Ane nulambi, nuuliangaahe, 'Moapari roangku nihurungi hai dake? 5 Moapari hai nipanangka mai paenua pera au napaenui ampuku hai napake wori medodi? Ikamu mobabehimokau dake au mahile.'" 6 Kanalambinda topokadipura sou halalunahe Yusupu, nauliangaahe hintoto hai pangulina Yusupu. 7 Mehanahe iria, "Apa tunggaiamu ampu? Kehapingkai mosumpa barangkai bai mobabehi dake au nodo. 8 Nuisato ampu, mogalo doi au kilambi i lalu karu i wongko pare roomi kipopasule i ampu, mewali bara mesua akala ane ikami mopanangka mbuli pera ba bulawa i lalu souna biti datu. 9 Ane hadua hangko irikami rapolambii anu iti, aginami ia rahuku mate hai ikami ope-ope napohawi ampu." 10 Nauli toratudu iti, "Maroami, agayana hema pea au rapolambii paenua iti, batena ia au ina mewali hawingku; au ntanina peisami liu-liu." 11 Hoholigamohe motaura antianda hai mobungkahi karunda hadua-hadua. 12 Topokadipura souna Yusupu moparesa karunda, mepongka i karuna au towutu alana hawe i karuna au toadi, hai paenua iti ralambi i karuna Benami. 13 Wutunahe masusa ntepuu lalunda, panehe mohepa-hepa hampinda. Rahawira antianda i kalide panehe mesule lao i kota. 14 Kahawenda Yuda hampohalalua i souna Yusupu, indo mani ia hai molingkuduhe motumpa i lindona. 15 Nauli Yusupu, "Moapa hai nodo babehiami? Bara pae niisa kaikona peisa mangisa babehiami au kadake lawi medodina?" 16 Mehana Yuda, "Apa mani pae au kuuli ampu? Noumba mani pesapungki hai noumba mani kanupomosongki? Pue Ala mopatongawami kamasalangki. Ide-ide ikami ope-ope mewalimongkai hawimu, bara pea au rapolambii paenua iti." 17 Nauli Yusupu, "Bara nodo tunggaiaku! Batena au rapolambii paenua iti, ia pea au ina kupohawi. Au ntanina peisa mesule i umami."
Yuda mamperurui Benami
44:18 Yuda mohungkuki Yusupu hai nauli, "Merapina ampu. Ane nupomaroa mololita manina i ampuku, inee wongkoya nukarumpui, lawi ampuku himbelami hai datu. 19 Ampu roomi mekune irikami, 'Ara mani pae umami hai halalumi au ntanina?' 20 Mehanangkal, 'Umangki ara mani agayana saemi hai pesupana adingki umangki sae ntepuumi. Wutuna adingki au hangina-nginahe matemi, mewali ide-ide batena rai ia haduduana au tuwo. Idomi hai napokakaya mpuu umangki.' 21 Napopeantimi mai ampu adingki, bona nuita, 22 pane mehanangkai, 'Anangkoi iti bara mpuu peisa mampogaaki umana, lawi ane ia mampogaaki umana, uma peisa-peisa mate mablla.' 23 Pane nauli ampu irikami, 'Barakau peisa mai i lindoku ane bara mai nianti adimi.' 24 Pesulengki hawe i uma, kipetumbuiami lolitana ampu. 25 Hangko inditi natudu mbulimongkai mai uma meholo pare. 26 Mehanangkai, 'Barangkai peisa molindo biti datu ane adingki au totoadi bara kianti. Peisangkai lao ane adingki wori meula.' 27 Pane nauli umangki, 'Niisato sambokongku Raheli batena pea rodua anana. 28 Au towutu napalehimona. Hanoto ia matemi nahaka singa, lawi duuna ide barapi kuita. 29 Ane niala mbulimi adimi au totoadi ide hangko iriko hai ara au mewali iria, kapari au nibabehiana ina mopaholigami kapateangku lawi ide saemona!' 30-31 Idomi ampu, ane mesulena i umangki barapi hai adingki iti, manoto kapatenami umangki. Tinuwuna umangki batena tetangge i anangkoi iti, hai ia sae ntepuumi pane kapari lalu au kibabehia ina moantimi kapateana. 32 Hampaka mbuli modandimona i umangku, iko au motanggu katuwona anangkoi iti. Kupololita i uma ane barapi kuanti anangkoi iti mesule iria, ikomi motanggu rahuku duungku mate. 33 Mewali kuperapi i ampu, aginami iko inde napohawi ampu mopahurungina iti adingki, bona ia mesule pea hihimbela hai wutunahe. 34 Bara kubuku mesule i umangki, ane adingki ide barapi kianti. Barana bai moita kapari lalu au morumpa umangki."
Yusupu mampatongawa watana i halaluna
45:1 Yusupu barapi nabuku motaha laluna i lindonda topobagona. Idomi hai pane natuduhe tauna iti padu holiga hangko i lincu, bona ia mampatongawami i halaluna. 2 Opemohe topobagona mesuwu, moteriami Yusupu rurumihi, alana rahadi to Masiri au arahe i raoa lincu, pane tebambari hawe-hawe i souna datu. 3 Nauli Yusupu i halaluna, "Ikomi ide Yusupu. Tuwo mani pae uma?" Mohadi lolitana, langahe halaluna hai bara rabuku mehana. 4 Pane nauli Yusupu irihira, "Maikau inde." Mehungkukimohe halaluna, hai nauli mbuli, "Ikomi Yusupu, halalumi, au nipobalu i to Masiri. 5 Ineemokau langa ba niposandaa lalu i kanipobalungku. Katouana pue Ala haduduana moantimona mai moloru inde, bona mopatuwo tauna bosa. 6 Ide-ide hangko rompare tempo rimi, hai lima mani parena tauna bara peisa mantuda-ntuda hai mepare. 7 Anti peundeana Pue Ala raantina mai moioru hangko irikamu. Ide hambua rara au mewalimi au ina mopatuwokau duuna hawe i pemuleami. 8 Mewali bara anti kanipobalungku panena hawe inde, agayana Pue Ala. Ia mampopewalina biti datu, raweina kuasa i ope-ope tauna hai humalele tampo Masiri. 9 Ide-ide holigamokau mesule lao i uma, hai nipetumbuia lolitangku node, 'Iko ide anamu Yusupu naweina Pue Ala kuasa i tampo Masiri. Maimi holiga mampombelambiana. 10 Uma peisa maida i Masiri i tampo Gose, bona hungku iriko hihimbela hai ampunahe, dimbana, towauna, japina hai hlnangkana anu-anuna. 11 Ane uma maidami i tampo Gose, peisami kukadipura, lawi tempo rimi lima mani parena. Ina kuhaoki rara bona uma hai halalungku hai binata ope-ope bara ina molambi kapari.'" 12 Ide-ide niita haduduami hai nodo wori oyo Benami, ikomi dide Yusupu. 13 Nipetumbula i umanta, noumba kahilena kuasangku inde i tampo Masiri. Nipololita hinangkana au niitami hai holigami mai nianti inde." 14 Roo nodo, Yusupu mokalapuimi Benami, adina, pane moteria. Benami wori moteria mokalapui Yusupu. 15 Hangko indo tangana mani moteria, Yusupu mokalapui ope-ope halaluna hai naangkihe. Roohe mombeteriahi, mepongkamohe molololita. 16 I karahadina bambarl kahawenda halaluna Yusupu i souna datu, datu hai ope-ope topobagona matana lalunda. 17 Nauli datu i Yusupu, "Nuuliaahe halalumu iti mokadipura pare i kalidenda, hangko mesulerahe lao i Kanaa 18 moala umamu hantina bona melimbamohe mai inde. Ina kuweihe tampo au marudu i Masiri, bona maroa katuwonda maida i tampo iti. 19 Nutudu worihe moanti hangko inde bahangkia kareta rapesawii sambokonda, ananda au koi mani hai napesawii umamu. 20 Ineemohe mampekiri anu-anunda au rapalehi, lawi au maroa ntepuu i tampo Masiri ina kuweihe." 21 Ananahe Yako mampeulai hawana datu iti. Naweihe Yusupu bahangkia kareta hai bakunda i rara hintoto hai pangulina datu. 22 Nawei worihe hampinda hadua-hadua au maroa, agayana Benami rawei doi pera talu atuna hai hampina au wou lima tauna. 23 Napakatu wori i umana hampulo baana kalide au rapopoanti anu-anu maroa hangko i tampo Masiri, hai hampulo wori kalide rapopoanti pare, roti, hai paande au ina rapobaku melimba i Masiri. 24 Opemi timama antianda, napopelingkamohe Yusupu halaluna, hai nauliaahe, "Ineekau mobungka-bungka i rara." 25 Meangkamohe mopalehi Masiri, mesule lao i Kanaa paidana Yako umanda. 26 Rapetumbuia umanda, "Tuwo mani wei Yusupu, uma! Ia makuasa i humalele tampo Masiri." Mohadi bambari iti, tingkara laluna Yako, hai bara manihe napoinalai. 27 Agayana roo pea rapololita hinangkana lolitana Yusupu irihira, hai moita kareta au napakatu Yusupu mai moala lao i tampo Masiri, hangko manotori laluna hai napomosomi. 28 Nauli Yako, "Anangku Yusupu tuwo mani wei! Idemi anangku au rauli matemi. Laomi kugagu holiga bona kuita mani hangko damanina mate."
Yako hantina melimba lao i Masiri
46:1 Pane Yako hantina mangkadipura anu-anunda hai melingkahe. Hawehe i boea Baraseba, ia mampopenomba binata i Pue Ala au napenombai Isaki umana. 2 I hambela kaindi i lalu peitana, mongkorami Pue Ala iria, "Yako, Yako!" Mehana Yako, "Idetona, Pue." 3 Mongkora mbuli Pue Ala, "Ikomi Pue Ala au napenombai umamu. Ineeko langa lao i Masiri. Iko ina mampopewali pemuleamu au mahile i tampo Masiri. 4 Iko mamporangaiko lao i Masiri hai moanti mbuli pemuleamu mesule i tampo ide, hai ane hawemi tempomu mate, Yusupu ina mokadipurako." 5 Roo indo, ananahe Yako tobalilo mampopesawi umanda, sambokonda hai ananda i kareta au napakatu mai datu i Masiri, pane meangkamohe hangko i boea Baraseba. 6-7 Raanti worihe binatanda hai anu-anunda au rahumba i tampo Kanaa, pane lao i Masiri Yako hai ope-ope pemuleana, anana hai ampunahe. 8 Idemohe hanganda hantambiana Yako au melimba lao i tampo Masiri: 9-15 Ananahe Yako hai Lea au tobalilo, pombeusuna node: Rube, anana Yako au towutu, hai ananahe: Heno, Palu, Hero hai Karami. Simeo hai ananahe: Yemueli, Yami, Ohe, Yaki, Soha hai Saulu. Inana Saulu iami to Kanaa. Lewi hai ananahe: Gerisoni, Keha, hai Merari. Yuda hai ananahe: Ere, Ona, Sela, Pere, hai Sera agayana Ere hai Ona matemohe i Kanaa. Ananahe Pere iami Hesero hai Hamu. Isaka hai ananahe: Tola, Pua, Ayubi, hai Simoro. Sebulo hai ananahe: Sere, Elo, hai Yaheli. Ara mani hadua ananda towawine hangana Dina. Mewali pemuleana Yako hai sambokona Lea au mesupahe i Mesopotami, kabosanda talu pulona hai talu tauna. 16-18 Ananahe Yako hai Silipa, hawina Lea au nawei Laba, meula wori. Pombeusuna hanganda node: Gadi hai ananahe: Sipio, Hagi, Suni, Ebo, Eri, Arodi hai Areli. Asere hai ananahe: Yimina, Yesiwa, Yesiwi, Beria, hai Sera, halalunda towawine. Ananahe Beria iami Hebe hai Maki. Mewali pemuleana Yako hai sambokona Silipa, kabosanda hampulo hai ini tauna. 19-22 Ananahe Yako hai Raheli, pombeusuna node: Yusupu hai ananahe hangko i sambokona Asana au rapoanaka i Masiri: Manase hai Eparai. Asana iami anana Potipera tadulako menomba i Heliopoli. Benami hai ananahe: Bela, Beheri, Asebe, Gera, Naama, Ehi, Rosi, Mupimi, Hupi, hai Are. Mewali pemuleana Yako hai sambokona Raheli, kabosanda hampulo hai iba tauna. 23-25 Ananahe Yako hai Biliha, hawina Raheli au nawei Laba, pombeusuna node: Dani hai anana: Husi. Natali hai ananahe: Yase, Guni, Yese hai Sele. Mewali pemuleana Yako hai sambokona Biliha, kabosanda pitu tauna. 26 Pemuleana Yako au melimba lao i tampo Masiri, poguluanda ini pulonda hai ini, bara mani tepesua manianahe. 27 Ananahe Yusupu au rapoanaka i Masiri roduahe mewali Yako hantinahe hawe i Masiri, poguluanda ope-ope pitu pulona.
Yako hai pemuleana i tampo Masiri
46:28 I lalu polumaonda, Yako motudu Yuda moioru lao mokakio Yusupu bona mai mampombelambia umanda i tampo Gose. 29 Yusupu mopasilolonga hai mesawi i kareta lao mohidupa hai umana inditi. I pohidupanda iti, ia mokalapui umana hai mahaehe mombeteriahi. 30 Nauli Yako i Yusupu, "Ide-ide peisamona mate, lawi kuitamoko hai kuisa oyo tuwomaniko." 31 Nauli Yusupu i halalunahe hai tinana au ntanina, "Iko lao mampopaisa i datu halalungku hai tinana umangku au maida i tampo Kanaa hawemohe inde. 32 Kupahawe rai i datu kaikamuna toporewu dimba hai japi, hai ope-ope binatami hai anu-anumi niantimohe mai. 33-34 Ane nakakiokau datu hai napekune bagomi, nipololita iria, 'Hangko anangkoi maningkai duungki mahile, ikami topokadipura binata hangko i tolorungkipi.' Ane nodo nipololita, ina natudukau maida i tampo Gose." Ido hai nauli Yusupu nodo lawi bara raunde to Masiri mampogulua toporewu.
Yako mampombelindoa datu i Masiri
47:1-2 Hangko inditi Yusupu moantihe lima halaluna lao mampombelindoa datu, nauli, "Umangku hai halalungku hangko i Kanaa hawemohe moanti towau, japi hai ope-ope anu-anunda. Ide-ide aramohe i tampo Gose." Pane napopaisaa worihe halaluna iti i datu. 3 Datu mekune irihira, "Apa bagomi?" Mehanahe, "Ampu, ikami ide toporewungkai nodohe tolorungki. 4 Maingkai i tampo ide, lawi i tampo Kanaa rumihi kamarimi, pane barapi ara hehi paandenda towau hai dimba. Ane napaliungkai datu, ikami maida i tampo Gose." 5 Pane nauli datu i Yusupu, "Ide-ide umamu hai halalumu aramohe inde. 6 Nipahimbelami tampo Masiri ide nodo tampomi haduduami. Paliukangaahe maida i tampo Gose, tampo au marudu ntepuu. Hai nupatokami tauna au mapande mobago bona mokadipura binatangku." 7-8 Yusupu mampopaisa wori umana i datu hai Yako merapi bona datu nawati Pue. Pane datu mekune iria, "Hangkiami tinuwunta, uma?" 9 Mehana Yako, "Tinuwungku datu, hangatumi hai talu pulona parena himbela tuwo topolilo. Katuwongku buke kapari hai sosoe ane tapahimbela hai tinuwunda toiorungku i poliloanda." 10 Roo nodo, Yako merapi mbuli bona datu nawati Pue hai mepalakanami. 11 Yusupu motulungi mopahuda halalunahe maida i Masiri. Naweimohe tampo au marudu ntepuu mewali kiranda i tampo Ramese, hintoto hai pangulina datu. 12 Hai Yusupu mopaara paandena umana hai halalunahe hawe-hawe i ananda.
Yusupu mopatinda lalunda wutuna
50:15 Matemi umanda, mololitamohe halaluna Yusupu, rauli, "Noumbamoke ane rapana Yusupu mopailaluke hai nahurungi babehianta au kadake iria hangkoya?" 16-17 Ido hai mopakatuhe lolita i Yusupu node, "Hangko damani mate umanta, natudumongkai mololita node, 'Nuampungimi kamasalanda hangkoya irio.' Mewali himbela tauna au mepoinalai i Pue Ala au napenombai umanta, kiperapi wongkamia maroa ineemi nupeita sala au kibabehimi." Kanahadina Yusupu lolita iti, la moteria lawi langamohe halaluna iria. 18 Pane hawemohe halaluna ope-ope iria mai motumpa meampu i lindona, rauli, "Ikami ide hawimu." 19 Agayana nauli Yusupu irihira, "Ineemokau langa, lawi ide iko barana himbela hai Pue Ala au makuasa mohurungi dake tauna. 20 Nauri hintuwumokau ope-ope mobabehi dake iriko, agayana Pue Ala mobaliki au kadake iti mewali au maroa, bona hinangka au mewalimi hangkoya iti mopatuwo tauna bosa hai mopakaroa katuwonda ide-ide. 21 Mewali ineemokau langa lawi ina kupasilolonga hinangka au nipotuwo hawe-hawe i anaml." Nodomi la mopatinda lalunda hai lolita au maroa pane matanami lalunda.